“आगामी ३ दिनभित्र अत्यधिक पानी पर्ने सम्भावना भएकाले आवश्यक तयारी गरी सतर्क रहनुहुन अनुरोध छ ।” सान्नीत्रिवेणी गाउँपालिकाको बिहान, सामुदायिक स्वयंसेवक शर्मिला संज्यालको माइकबाट निस्किएको यो सूचना गाउँमा गुन्जियो ।
शर्मिलाको यो सन्देशसँगै गाउँमा तयारी सुरु भयो । “अत्यधिक पानी पर्ने कुरा थाहा पाएपछि हामीले, पाकेको अन्न काटेर भित्र्याउन मिल्ने छ भने भित्र्याउँछौँ । घर वरिपरि र टोलका पानी बगेर जाने कुलो, नाली सफा गरी तयारी गछौं” स्थानीय रेश्मा कुमारी भट्टराई भन्नुहुन्छ ।
यो परिवर्तनको जरो भने स्थानीय आपत्कालीन कार्य सञ्चालन केन्द्र हो । । आपत्कालीन कार्य सञ्चालन केन्द्रका प्रमुख तथा सम्पर्क व्यक्ती सागर साही भन्नुहुन्छ, “पहिले विपद् पर्दा हामी अन्योलमा हुन्थौं, तर अहिले हामीले स्थानीय आपत्कालीन कार्य सञ्चालन केन्द्र स्थापन गर्न सफल भयौँ । अहिले हामीसँग खोज, उद्धार, प्राथमिक उपचार लगायतका सामग्री तथा तालीम प्राप्त जनशक्ति छ ।” उहाँ थप्नुहुन्छ, “अहिले हामी समुदायमा विपद् प्रतिकार्यको लागि सूचना सङ्कलन गछौं, आपत्कालीन सूचना प्रवाह गछौं, खोज, उद्धार तथा राहतका लागी समन्वय तथा व्यवस्थापन गर्न सक्छौँ । अब हामी बलियो भएका छौँ ।”
