रङ्गे दाइको परिवर्तन

क्रियटिभ खबर, ५ श्रावण २०८२, काठमाडौँ । “घरमा शौचालय बनाउने कुरा सुन्दा पहिले त मलाई रिसै उठ्यो ।” सान्नीत्रिवेणी गाउँपालिका–४ का ६३ वर्षीय रङ्गे तिरुवा आफ्ना पुराना धारणा सम्झेर मुस्कुराउनुहुन्छ । उहाँ भन्नुहुन्छ, “मैले त जन्मेदेखि शौचालय बिना नै जिवन बिताएँ, तैपनि चल्दो रैछ भनेर सोचेको थिएँ ।”
तर समयसँगै सोच बदलियो । रेडक्रसका स्वयंसेवकहरू बारम्बार सम्झाउन आइरहँदा रङ्गे दाइको मन बिस्तारै पग्लिन थाल्यो । “उहाँहरू बारम्बार आएर सम्झाइरहनु भयो, तब बल्ल लाग्यो, होइन अब त शौचालय चाहिन्छ,” रङ्गे दाइ भन्नुहुन्छ ।
सबैले रङ्गे दाइ भनेर चिनिने उहाको आर्थिक अवस्था अलि कमजोर थियो, मनमा लागे पनि हातमा साधन थिएन । त्यसपछि रेडक्रसले शौचालय निर्माणका लागि आवश्यक सामग्रीहरू पनि सहयोग ग¥यो । अहिले उहाँले आफ्नो घरमै सफा, व्यवस्थित शौचालय निर्माण गर्न सफल हुनुभएको छ ।
“अब त शौचालयमा साबुन, पानी, ब्रस, केमिकल सबै राखेको छु,” रङ्गे दाइ गर्वका साथ भन्नुहुन्छ, “शौचालय बनाएपछि पाहुना आउँदा समेत इज्जत बढ्ने रहेछ, अनि आफैंलाई पनि सन्तोष भएको छ । अहिले त सोच्छु, पहिले यतिका वर्ष कसरी बसियो होला शौचालय बिना !”